काठमाडौं — कृषि क्षेत्रमा निरन्तर बढिरहेको लागत, बजारमा देखिएको अस्थिरता र बिचौलियाको प्रभावले आफूहरू संकटमा परेको भन्दै देशका विभिन्न जिल्लाबाट आएका साना किसानहरूले काठमाडौंको माइतीघर मण्डलमा प्रदर्शन गरेका छन्। उनीहरूले साना किसानलाई विस्थापित हुनबाट जोगाउन सरकारले तत्काल ठोस नीति ल्याउनुपर्ने माग गरेका छन्।

प्रदर्शनमा सहभागी किसानहरूले आफूहरूले उत्पादन गरेको कुखुरा तथा कृषि उपजको उचित मूल्य नपाउँदा लगानीसमेत उठाउन कठिन भइरहेको बताएका छन्। उत्पादन लागत बढ्दै जाने तर बजार मूल्य किसानको नियन्त्रणबाहिर रहने अवस्थाले साना किसानलाई थप समस्यामा पारेको उनीहरूको भनाइ छ। किसानहरूले उत्पादक र उपभोक्ताबीचको दूरी घटाएर प्रत्यक्ष बजारको व्यवस्था गर्नुपर्ने माग गरेका छन्। उनीहरूले किसान र उपभोक्तालाई जोड्ने प्रणाली विकास गर्न सके बिचौलियाको प्रभाव घट्ने र त्यसको प्रत्यक्ष लाभ किसान तथा उपभोक्ता दुवैलाई पुग्ने बताएका छन्।

प्रदर्शनमा सहभागी किसानहरूले पोल्ट्री क्षेत्रमा लागू गरिएको ग्रेडिङ प्रणाली खारेज गर्नुपर्ने मागसमेत अघि सारेका छन्। उनीहरूका अनुसार उत्पादनको वर्गीकरण तथा बिक्री वितरणसँग सम्बन्धित व्यवस्थाले साना किसानलाई थप असहज बनाएको छ। किसानमैत्री ढंगले नीति पुनरावलोकन गर्न उनीहरूले सरकारसँग आग्रह गरेका छन्।

त्यस्तै, किसानहरूले भारतबाट हुने कुखुराको तस्करी तत्काल नियन्त्रण गर्नुपर्ने माग राखेका छन्। अवैध रूपमा भित्रिने कुखुरा तथा कुखुराजन्य उत्पादनका कारण स्वदेशी किसानले उत्पादन गरेको वस्तुले बजारमा प्रतिस्पर्धा गर्न नसक्ने अवस्था सिर्जना भएको उनीहरूको दाबी छ। कुखुरा उत्पादनका लागि अत्यावश्यक दाना र चल्लाको मूल्य पारदर्शी हुनुपर्ने किसानहरूको अर्को प्रमुख माग छ। दाना र चल्लाको मूल्य निर्धारण प्रक्रियालाई पारदर्शी बनाउँदै किसानले वास्तविक लागत र मूल्यबारे स्पष्ट जानकारी पाउने व्यवस्था गर्नुपर्ने उनीहरूको भनाइ छ।