हमासले बन्धकलाई घाइते अवस्थामा अस्पताल लगेको भिडिओ हालै सार्वजनिक भएको छ । इजरायली डिफेन्स आर्मी आइडिएफले नेपाली र थाई नागरिकलाई हमासले बन्धक बनाएको भन्दै एक भिडिओ सार्वजनिक गरेको हो ।उक्त भिडिओ गाजाको अल शिफा अस्पतालको भएको दावी गरीएको छ । आइडिएफले एक्सबाट सार्वजनिक गरेको भिडिओमा हमासले दुई जना घाइतेलाई अस्पताल लैजाँदै गरेको दृश्य रहेको छ । भिडिओमा एक जनालाई दोहोर्याइँदै अस्पतालभित्र लगिएको र अर्का व्यक्तिलाई स्ट्रेचरमा राखेर उपचार कक्षमा लगिएका दृश्य छ । आइडिएफले एक्समार्फत ती दुईमध्ये एक नेपाली र एक थाई नागरिक रहेको बताएको छ ।
आइडिएफले ती व्यक्तिहरू को हुन् र अहिले कहाँ छन् भन्ने नखुलेको जानकारी दिएको छ । उनीहरूलाई लगिएको अस्पतालमा १० मिटर तल ५५ मिटर लामो सुरुङ पनि फेला परेको भन्दै इजरायलले भिडिओ सार्वजनिक गरेको छ । उक्त सुरुङको प्रवेशद्वार माइन र बुलेट प्रुफयुक्त रहेको उल्लेख गरेको छ ।
