नेपालमा सूचना प्रविधि (आईटी) क्षेत्रको विकासलाई प्रोत्साहित गर्न अघिल्लो सरकारले घोषणा गरेको “आईटी दशक” कार्यक्रम बजेटको अभावमा अलपत्र परेको छ। सञ्चार तथा सूचना प्रविधिमन्त्री पृथ्वीसुब्बा गुरुङले बजेट नछुट्याइएकाले यो महत्त्वाकांक्षी योजनाको कार्यान्वयनमा चुनौती आएको बताउनुभएको छ।
काठमाडौंमा आयोजित ‘स्टार्टअप एण्ड मिडिया फेस्ट—२०२४’ मा बोल्दै मन्त्री गुरुङले कृषिमा प्रविधिको प्रयोगलाई बढावा दिने घोषणाहरू युवाहरूलाई उत्साहित पार्न नसकेको भन्दै यसले उनीहरूलाई विदेशिन बाध्य बनाएकोमा चिन्ता व्यक्त गर्नुभयो। उहाँले डिजिटल नेपाल फ्रेमवर्कलाई कार्यान्वयन गर्न पनि बजेट अभावका कारण अवरोध आएको बताउनुभयो।
सरकारले सूचना प्रविधिलाई उद्योगका रूपमा विकास गर्दै देशलाई ‘आईटी हब’ बनाउने लक्ष्य राखेको छ। यसै सन्दर्भमा, विशेष आर्थिक क्षेत्र विकास गर्ने योजना पनि अघि सारिएको छ। आगामी तीन वर्षभित्र आईटी क्षेत्रबाट ३ लाख रोजगारीका अवसर सिर्जना गर्ने लक्ष्य रहेको र यसका लागि मन्त्रालयले विशेष योजना ल्याउन लागेको मन्त्री गुरुङले उल्लेख गर्नुभयो।
सरकारले डिजिटल र आईटी क्षेत्रलाई प्रवर्द्धन गर्न भनेको भए पनि आवश्यक बजेट र स्रोतसाधन अभावले गर्दा कार्यक्रमहरू कार्यान्वयनमा समस्या देखिएको छ। यस्तो अवस्थाले युवाहरूमा निराशा बढाएको र उनीहरूलाई वैदेशिक रोजगारीतर्फ आकर्षित गरिरहेको देखिन्छ। मन्त्री गुरुङले डिजिटल नेपाल फ्रेमवर्कलाई सफल बनाउन प्रधानमन्त्री र अर्थ मन्त्रालयसँग सहकार्य गर्दै अघि बढ्ने प्रतिबद्धता व्यक्त गर्नुभयो।
यो समस्या समाधान गर्न समयमै बजेट विनियोजन गरी युवा उद्यमशीलता र रोजगारीका अवसरहरू सृजना गर्ने कदम चाल्नुपर्ने आवश्यकता देखिएको छ।
