काठमाडौं । प्रधानमन्त्री पुष्पकमल दाहालले फोहर व्यवस्थापन गर्ने जिम्मेवारी र संयोजन सहरी विकास मन्त्रालयलाई जिम्मा दिने बताउनु भएको छ ।

प्रधानमन्त्री तथा मन्त्रिपरिषद् कार्यालय सिंहदरबारमा बसेको बैठकमा दाहालले देशैभरको फोहोर दीर्घकालीन समाधानका लागि मन्त्रालयलाई दिन खोजिएको सरोकारवाला पक्षलाई बताउनु भएको हो । बैठकमा बञ्चरेडाँडाको फोहर व्यवस्थापन, स्थानीय प्रभावित नागरिकले उठाएका माग, डम्पिङ साइडका लागि जग्गा खरिदलगायतका विषयमा छलफल भएको थियो । आउँदो मन्त्रिपरिषद्बाट सो निर्णय गर्ने प्रधानमन्त्री दाहालले बैठकमा जानकारी गराउनु भएको थियो ।

बैठकमा सहरी विकासमन्त्री सीता गुरूङ, नेपाल सरकारका मुख्यसचिव डा. बैकुण्ठ अर्याल, प्रधानमन्त्री कार्यालयका सचिवद्वय एकनारायण अर्याल र मणिराम गेलाल, सहरी विकास मन्त्रालयका सचिव रवीन्द्रमान श्रेष्ठ, लगानी बोर्डका कार्यकारी निर्देशक सुशील भट्ट, काठमाडौं महानगरपालिकाका प्रमुख प्रशासकीय अधिकृत बसन्त अधिकारी, ललितपुर महानगरपालिकाका प्रमुख प्रशासकीय अधिकृत वीरेन्द्रदेव भारतीलगायतको उपस्थिति रहेको थियो ।