काभे्र –अरनिको राजमार्गअन्तर्गत काभ्रेको धुलिखेल–खावा सडकमा निर्माण कार्य सुस्त भएको र जनताले दुःख पाएको भन्दै जिल्ला समन्वय समिति काभ्रेका प्रमुख दिपक गौतमले हिजो देखि अनशन सुरु गरेका छन। निर्माण कार्यमा भएको ढिलाई अन्त्यका लागि अनशन बसेको उनले बताएका छन । त्यस्तै आज निर्माण कार्य सुस्त भएको र जनताले दुःख पाएको भन्दै स्थानियले बिहान १ घण्टा उतm सडकमा चक्का जाम गरेका छन् ।

चार किलोमिटर लामो धुलिखेल–खावा सडक खण्ड विस्तारको काम अत्यन्तै सुस्त भएको भन्दैे समन्वय प्रमुख गौतमले सरोकारवालासँग पटक–पटक छलफल गरेका थिए । तर निर्माण कार्य अलपत्र छ ।

यसअघि प्रधानमन्त्री पुष्पकमल दाहाल प्रचण्डले समेत धुलिखेल–खावा सडक बनाउन पहल गर्ने प्रतिवद्धता जनाएका थिए । पाँचखालमा महिला उद्यमी हरित औद्योगिक पार्क शिलान्याश कार्यक्रममा बोल्दै प्रधानमन्त्री प्रचण्डले छिटोभन्दा छिटो बाटो बनाउन पहल गर्ने बताएका हुन् । उनले यहाँबाट फर्केपछि निर्माण व्यवसायीलाई बोलाएर निर्माण व्यवसायीको केहि समस्या छ भने सम्बोधन गर्ने नत्र भने छिटो भन्दा छिटो बाटो बनाउनका लागि पहल गर्ने बताएका थिए । तर हालसम्म कुनै प्रगति भएको छैन ।

सडक डिभिजन कार्यालय भक्तपुर र निर्माण कम्पनी गौरी पार्वती निर्माण सेवा प्रालिबीच २२ महिनामा सडक खण्ड विस्तार एवम् स्तरोन्नतिको काम सक्ने गरी २०७९ साल जेठ २० गते सम्झौता भएको थियो । तर कम्पनीले सम्झौताअनुसार काम नगरेर अलपत्र पारेको छ । कम्पनीले आउँदो चैत १९ गतेसम्म काम सम्पन्न गर्नुपर्ने सम्झौता भएको थियो ।

निर्धारित समयमा काम सम्पन्न गराउन जिल्लास्तरमा सरोकारवालाको पटक–पटक छलफल भए पनि ठेकेदार कम्पनीले काम गर्न आलटल गर्दै आइरहेको छ । समयमै काम सम्पन्न नहुँदा घाम लाग्दा धुलाम्मे र पानी पर्दा हिलाम्मे हुँदा यस सडक भएर आवतजावत यात्रा गर्ने यात्रुले सास्ती खेप्दै आइरहेका छन् भने दैनिकजसो दुर्घटना हुने गरेको छ ।

काभ्रेपलाञ्चोकको पूर्वी–उत्तरी क्षेत्र अर्थात् उत्तरीनाका तातोपानी पुग्न अरनिको राजमार्ग हुँदै जाने गरिन्छ । यस्तै सिन्धुपाल्चोक, रामेछाप, दोलखालगायतका विभिन्न ठाउँबाट आवतजावतका लागि यही सडक प्रयोग हुन्छ ।