नेपाली कांग्रेसका पूर्वसांसद मोहम्मद आफताब आलमलाई ज्यान मुद्दाबाट सफाइ दिने उच्च अदालतको फैसलाविरुद्ध सरकार पुनरावेदनमा गएको छ । उच्च अदालत जनकपुरको वीरगञ्ज इजलासले गरेको फैसलाविरुद्ध महान्यायाधिवक्ता कार्यालय पुनरावेदनका लागि सर्वोच्च अदालत गएको महान्यायाधिवक्ता कार्यालयका प्रवक्ता सूर्यराज दाहालले जानकारी दिनुभयो । यसअघि असार २५ गते महान्यायाधिवक्ता रमेश बडालले पुनरावेदनमा जाने निर्णयमा हस्ताक्षर गर्नुभएको थियो ।

तल्लो अदालतको फैसलामा एक तह माथिको अदालतबाट फेरबदल भएमा महान्यायाधिवक्ता कार्यालयले आफ्नो मागदाबी लिइ सर्वोच्च अदालतमा जाने नीति छ । महान्यायाधिवक्ता कार्यालयले उच्च अदालतबाट सफाइ पाएका आलमसहित सबै आरोपितहरूलाई दोषी ठहर गर्नुपर्ने र जिल्ला अदालतबाट सफाइ पाएकालाई पनि दोषी ठहर गर्नुपर्ने एकमुष्ट मागदावी लिई सर्वोच्च अदालतमा पुनरावेदन दिइएको हो । गत जेठ १४ मा उच्च अदालतको वीरगञ्ज इजलासका न्यायाधीशहरू खुसीप्रसाद थारु र अर्जुन महर्जनको इजलासले ज्यानमुद्दामा आलम लगायतलाई आरोपबाट सफाइ दिने फैसला गरेको थियो ।