टोकियो – उत्तरी जापानको इवाते क्षेत्र अन्तर्गत ओफुनातो सहरमा लागेको भीषण डढेलोका कारण ८० भन्दा बढी भवनमा क्षति पुगेको छ भने ६०० भन्दा बढी स्थानीय बासिन्दा सुरक्षित स्थानमा सारिएका छन्। जापानी सार्वजनिक प्रसारक एनएचके द्वारा प्रसारण गरिएका दृश्यहरूमा डढेलोले जंगल तथा आवासीय क्षेत्रलाई पूर्ण रूपमा ध्वस्त बनाएको देखिएको छ।

डढेलो नियन्त्रण प्रयास जारी
सहर प्रशासनका अनुसार बिहीबार बिहानसम्म कम्तीमा ८४ वटा भवन जलेर नष्ट भइसकेका छन्। सेल्फ डिफेन्स फोर्सेज (SDF) का टिमहरूले आगलागीलाई नियन्त्रण गर्न आकाशबाट पानी खसाल्ने प्रयास गरिरहेका छन्, तर अहिलेसम्म पूर्ण रूपमा नियन्त्रणमा लिन सफल भएका छैनन्।

मेयरको प्रतिक्रिया :‘डढेलोको परिमाण विशाल छ’
ओफुनातोका मेयर कियोशी फुचिगामी का अनुसार डढेलोले करिब ६०० हेक्टर ९९१,५०० एकड० भूभाग नष्ट गरिसकेको छ, जुन मोनाकोभन्दा तीन गुणा ठूलो क्षेत्रफल हो।
डढेलोको कारण अझै खुलेको छैन, तर पछिल्लो समय पश्चिमबाट आएको तीव्र हावाले आगोलाई थप फैलाउने काम गरेको मेयरले बताए।

प्रत्यक्षदर्शीहरूको अनुभव
डढेलोबाट विस्थापित भएकी एक ४५ वर्षीय महिलाले एनएचके लाई बताइन् – “कामबाट फर्किंदा मेरो घरनजिकै आगो फैलिएको देखेँ। भाग्यवश, मेरा बच्चाहरू सुरक्षित छन् भन्ने जानकारी पाएपछि राहत महसुस गरें।”

३२ वर्षीय अर्का स्थानीय बासिन्दाले भने – “यति तीव्र गतिमा फैलिएको आगो मैले पहिलोपटक देखेको हुँ।”

जापानमा डढेलोको बढ्दो जोखिम
सन् २०२३ को फेब्रुअरीदेखि अप्रिलसम्म जापानमा १,३०० भन्दा बढी डढेलोको घटना दर्ता भएका थिए। इवाते क्षेत्रमा पछिल्लो डढेलोले वातावरणीय तथा आवासीय क्षति बढाउने चिन्ता थपिएको छ। सरकारले प्रभावित क्षेत्रका नागरिकलाई सुरक्षित स्थानमा सार्ने कार्य जारी राखेको छ भने दमकल तथा उद्धारकर्मीहरू आगलागी नियन्त्रणको लागि निरन्तर प्रयासरत छन्।