उदयपुर, फागुन १६ – आन्तरिक पर्यटन प्रवर्द्धन, प्रदूषणमुक्त वातावरणको संरक्षण र स्वस्थ जीवनशैलीलाई प्रोत्साहित गर्ने उद्देश्यले स्थानीय युवाहरूले ‘राइड टु कोसी’ साइकल अभियान सञ्चालन गरेका छन्। अभियानअन्तर्गत शुक्रबार उदयपुर सदरमुकाम गाईघाटबाट ३ सय साइकल यात्रीहरू दुई दिने यात्रामा निस्केका छन्।

साइकल यात्राको उद्देश्य र मार्ग

‘स्वास्थ्यका लागि साइकल, एकताका लागि सवारी’ भन्ने नाराका साथ जिल्ला साइकल संघ, उदयपुरको अगुवाइमा सुरु भएको यो अभियान मदन भण्डारी लोकमार्ग हुँदै विभिन्न ठाउँ पार गर्दै उदयपुर र सुनसरीको सीमा सप्त नदीसम्म पुगेर फर्किनेछ। शुक्रबार बिहान गाईघाट बजार परिक्रमा गरेपछि स्थानीय लोकतान्त्रिक चोक (पिपलचोक)मा आयोजित विशेष कार्यक्रममा त्रियुगा नगरप्रमुख वसन्त बस्नेत र उपप्रमुख महेश्वरी राईले राष्ट्रिय झण्डा हस्तान्तरण गर्दै अभियान टोलीलाई बिदाइ गरे। नगरप्रमुख बस्नेतले अभियान सफलताको शुभकामना दिँदै यस्ता पहलले आन्तरिक पर्यटन प्रवर्द्धनमा महत्त्वपूर्ण भूमिका खेल्ने बताए।

पर्यटन प्रवर्द्धन र वातावरण संरक्षण

साइकल यात्री समूहले जिल्लाका विभिन्न पर्यटकीय स्थलहरूको प्रचारप्रसार गर्दै वातावरण स्वच्छ राख्नका लागि सन्देश प्रवाह गर्ने लक्ष्य लिएको छ। साइकल यात्रु टोलीले मदन भण्डारी लोकमार्ग हुँदै बहेडवा थारु होमस्टे, चौदण्डीगढी, बेलटार, बसाहा बँदेलपानी, सुपाडे, रामपुर बजार, सेतीखोला, मैनामैनीको रङ्गमहल, टङ्केला गुफा, सोमबारे कोठु हुँदै चतारा पुग्नेछ। टोलीले शुक्रबार राति चतारामै बास बस्नेछ भने शनिबार फर्किनेक्रममा त्रियुगा नगरपालिका-३ भुल्केस्थित नेपाली सेनाको १८ नं. बाहिनी अड्डामा अभियानको समापन गरिनेछ।

आत्मनिर्भर अभियान

अभियानमा १५ वर्षीय बालकदेखि ५० वर्षसम्मका ३ सय जना सहभागी छन्। सहभागीमध्ये २३४ साइकल यात्री र ६६ स्वयंसेवक छन्। अभियान सञ्चालनका लागि कुनै सङ्घ, संस्था वा व्यक्तिसँग आर्थिक सहयोग नलिइ सम्पूर्ण खर्च युवाहरू आफैंले उठाएका छन्। अभियानका अगुवा भूपाल राउतका अनुसार, युवाहरू आफैं जुटेर स्वच्छ वातावरण, स्वस्थ जीवनशैली र सभ्य समाज निर्माण गर्न अग्रसर हुनु आवश्यक छ। अर्का अगुवा जितेन्द्र रोईलाले भने, युवाहरूको पहलमा गरिएको यस्तो अभियानले भविष्यका पुस्तालाई साइकल संस्कृतिप्रति आकर्षित गर्न मद्दत गर्नेछ।

अभियानको महत्व

साइकल अभियानले ध्वनि तथा वायु प्रदूषण घटाउने, ट्राफिक व्यवस्थापन सुधार गर्ने, पर्यटन प्रवर्द्धन गर्ने, र स्वस्थ जीवनशैलीलाई प्रवर्द्धन गर्ने लक्ष्य लिएको छ। स्थानीय प्रशासन, पर्यटन विज्ञहरू, तथा वातावरणविद्हरूले यस्ता पहलले समग्र समाजमा सकारात्मक प्रभाव पार्ने भन्दै अभियानको प्रशंसा गरेका छन्। आयोजक टोलीले भविष्यमा पनि यस्ता अभियानलाई निरन्तरता दिने प्रतिबद्धता व्यक्त गरेको छ।