नेपाली संगीतको चर्चित ब्यान्डले अस्ट्रेलियाका विभिन्न सहरमा जारी ‘रक यात्रा’ टुरमा दर्शकको उत्साहजनक साथ पाएको छ। पर्थबाट सुरु भएको अस्ट्रेलिया टुरअन्तर्गत क्यानबेरा हुँदै आइतबार ब्रिसबेनमा कन्सर्ट सम्पन्न भएको हो। क्यानबेरामा आयोजित कार्यक्रममा १ हजार ५ सयभन्दा बढी दर्शक सहभागी भएका थिए।
क्यानबेरा र ब्रिसबेनमा १९७४ एडीको यो तेस्रो कन्सर्ट हो। क्यानबेराको प्रस्तुति ‘तिमीलाई पिरतीले बाँधौला’ गीतबाट सुरु भएको थियो। त्यसपछि ब्यान्डले आफ्ना चर्चित गीतहरू प्रस्तुत गर्दा दर्शकले पनि गीतसँगै गाउँदै साथ दिएका थिए। कन्सर्टमा दर्शकको प्रतिक्रिया र नेपाली गीत–संगीतप्रतिको माया देखेर आफूहरू भावुक भएको ब्यान्ड सदस्य मनोजकुमार केसीले बताए।
‘हामी गीत गाउन मात्रै स्टेजमा पुगेका थिएनौं, दर्शकसँग जोडिन पुगेका थियौं। उनीहरू गीतसँगै गाइरहेको, रमाएको र केही गीतमा भावुक भइरहेको देख्दा हामी पनि भावुक भयौं,’ उनले भने, ‘अस्ट्रेलियाको हरेक सहरमा नेपाली संगीतप्रतिको माया देख्दा निकै खुसी लागेको छ।’ ब्यान्ड सदस्य मनोज सिंहले पनि अस्ट्रेलियाका विभिन्न सहरमा दर्शकको निरन्तर साथले ब्यान्ड र नेपाली संगीतबीचको सम्बन्ध बलियो रहेको देखाएको बताए।
‘हामीले कन्सर्टको अपेक्षा गरेका थियौं, तर दर्शकले त्यसलाई उत्सवमा बदलिदिनुभयो। सहर फेरिए पनि दर्शकको माया उस्तै छ,’ उनले भने, ‘१९७४ एडीका गीतसँगै हुर्किएको पुस्तादेखि नयाँ पुस्तासम्म एउटै ठाउँमा उभिएर नेपाली गीत गाएको दृश्य नै हाम्रो यात्राको सबैभन्दा ठूलो उपलब्धि हो।’ ब्यान्डका म्यानेजर अनुज कार्कीले लामो समयपछि ‘रक यात्रा’ मार्फत अस्ट्रेलियामा १९७४ एडीलाई दर्शकमाझ प्रस्तुत गर्न पाउनु विशेष अनुभव बनेको बताए।
‘ब्यान्डले स्टेजमा गीत प्रस्तुत गरिरहेको हुन्छ, तर त्यहाँबाट फर्किंदा दर्शकले दिएको ऊर्जा लिएर फर्किएका छौं,’ उनले भने, ‘अस्ट्रेलियाका हरेक सहरमा त्यो ऊर्जा झन् बलियो हुँदै गएको छ।’ हाल ब्यान्डमा निराकार याक्थुम्बा, सञ्जय श्रेष्ठ, एड्रियन प्रधान, फिरोज स्याङ्देन, मनोजकुमार केसी र मनोज सिंह रहेका छन्। ब्यान्डको अस्ट्रेलिया टुरअन्तर्गत न्युक्यासलमा सेप्टेम्बर ३०, सिड्नीमा अक्टोबर ३, मेलबर्नमा अक्टोबर ५ र एडिलेडमा अक्टोबर ८ मा सांगीतिक प्रस्तुति हुने तालिका छ। ‘रोटेपिङ’ को सहकार्यमा १९७४ एडीले युरोपका विभिन्न स्थानमा समेत सांगीतिक प्रस्तुति दिने कार्यक्रम रहेको जनाइएको छ।
