काठमाडौं । झापामा मतदातालाई “कुन उम्मेदवार वा कुन चुनावी चिह्नमा मत दिनुहुन्छ ?” भनेर सोध्नु पूर्ण रूपमा निषेध गरिएको छ।

जिल्ला प्रशासन कार्यालय झापाले मंगलबार एक सूचना जारी गर्दै यस्तो प्रश्न सोध्नु निर्वाचन आचारसंहिता उल्लङ्घन हुने स्पष्ट पारेको छ। सूचनामा भनिएको छ कि मतदातामा प्रत्यक्ष वा अप्रत्यक्ष दबाब सिर्जना गर्न खोज्ने कुनै पनि कार्यलाई कानूनी रूपमा दण्डनीय ठहरिनेछ। प्रशासनले मतदान प्रक्रियामा निष्पक्षता, स्वतन्त्रता र सुरक्षालाई सुनिश्चित गर्न मतदाता, पार्टी, कार्यकर्ता र सर्वसाधारणलाई सचेत रहन आग्रह गरेको छ।

जिल्ला प्रशासनले मतदाता शिक्षा कार्यक्रम र अवलोकन गतिविधि मार्फत निर्वाचन नियम–कानुनको जानकारी पनि गराउने जनाएको छ। यससँगै मतदानका क्रममा आचारसंहिताको पूर्ण पालना गर्न पार्टी तथा उम्मेदवारहरूलाई कडा चेतावनी दिइएको छ। झापामा आगामी निर्वाचनका लागि प्रशासनले मतदाता अधिकार र जिम्मेवारीको बारेमा जनचेतना फैलाउने योजना बनाएको जनाइएको छ।