काठमाडौँ- नयाँ राजनीतिक दल ‘उज्यालो नेपाल पार्टी’ आज दिउँसो १ बजे औपचारिक रूपमा घोषणा हुँदैछ। राजधानीमा आयोजना गरिने कार्यक्रममा संस्थापक सदस्य, बुद्धिजीवी, युवा प्रतिनिधि, महिलाहरू तथा विभिन्न क्षेत्रका सरोकारवाला व्यक्तिहरूको उपस्थिति रहने जनाइएको छ। घोषणा समारोहका लागि आयोजना गरिएको कार्यक्रममा पार्टीले आफ्नो घोषणापत्र, दीर्घकालीन भिजन, संरचना, संगठन विस्तारको योजना र देशको राजनीतिक, आर्थिक तथा सामाजिक परिवर्तनका लागि प्रस्तुत गर्ने एजेन्डा सार्वजनिक गर्नेछ।

नयाँ राजनीतिक विकल्पको रुपमा हेरिएको

हालको राजनीतिक परिस्थितिप्रति जनस्तरमा बढ्दो असन्तुष्टिलाई लक्षित गर्दै गठन हुन लागेको उज्यालो नेपाल पार्टीले आफूलाई सुधारवादी, पारदर्शी र व्यवहारिक राजनीतिक शक्तिको रूपमा प्रस्तुत गर्ने तयारी गरेको बताइन्छ। युवाहरूलाई निर्णय प्रक्रियामा केन्द्रमा राख्ने, सुशासन, भ्रष्टाचार नियन्त्रण तथा स्थानीय विकासमा प्रत्यक्ष जनसहभागिता सुनिश्चित गर्ने लक्ष्यसमेत पार्टीले अघि सार्ने अनुमान गरिएको छ।

घोषणासँगै नेतृत्व टिम पनि सार्वजनिक हुने

आजको कार्यक्रममा पार्टीका अध्यक्ष, महासचिव लगायत प्रारम्भिक केन्द्रीय समितिको पनि नामावली सार्वजनिक गरिनेछ। पार्टीले आफ्नो संगठनलाई बिस्तारै जिल्लादेखि गाउँ–नगर तहसम्म विस्तार गर्दै आगामी स्थानीय तथा संघीय निर्वाचनमा सक्रिय रूपमा सहभागी हुने योजना बनाइरहेको बताइएको छ।

जनताको ध्यान नयाँ पार्टीतर्फ

हालका ठूला राजनीतिक दलहरूको आन्तरिक कलह र जनतामा बढ्दो अविश्वासका कारण मध्यस्थ तथा नयाँ राजनीतिक विकल्पको खोजी भइरहेका समय, उज्यालो नेपाल पार्टीको घोषणाले सार्वजनिक ध्यान तानेको छ। पार्टीले प्रस्तुत गर्ने नीति र कार्यक्रमले आगामी दिनमा नेपाली राजनीतिमा कत्तिको प्रभाव पार्छ भन्नेबारे विश्लेषकहरूले समेत चासो व्यक्त गरेका छन्।