काठमाडौं — नेपालमा बर्ड फ्लु (H5N1  संक्रमण पुष्टि भएको छ। पशु सेवा विभागका अनुसार नियमित निगरानीका क्रममा मोरङ जिल्लाको सुनवर्षी नगरपालिका–४ र उर्लाबारी नगरपालिका–५ मा पालिएका कुखुराको नमुना परीक्षण गर्दा संक्रमण देखिएको हो। संक्रमण पुष्टि भएसँगै कृषि तथा पशुपन्छी विकास मन्त्रालयको निर्णयअनुसार प्रभावित क्षेत्रमा तत्काल नियन्त्रणका उपायहरू लागू गरिएको छ। सो क्षेत्रमा रहेका कुखुरा, कुखुराजन्य पदार्थ तथा उत्पादनहरू नष्ट गर्ने कार्य सुरु गरिएको छ भने आवतजावतमा कडाइ गरिएको छ।

संक्रमण फैलिन नदिन कुखुरा फार्महरूमा अनावश्यक व्यक्तिको प्रवेशमा रोक लगाइएको छ। फार्ममा प्रवेश गर्दा अनिवार्य रूपमा जीवाणुनाशक प्रयोग गर्नुपर्ने व्यवस्था गरिएको छ। साथै, एक फार्ममा काम गर्ने व्यक्तिले अर्को फार्ममा जान नपाउने, प्रयोग भएका सामग्री पुनः प्रयोग नगर्नु पर्ने लगायतका मापदण्ड लागू गरिएको छ।

यसका अतिरिक्त कुखुरा राख्ने स्थानको नियमित सरसफाइ, बाहिरबाट आउने सवारी साधनको नियन्त्रण तथा अन्य जनावरको प्रवेशमा रोक लगाउन पनि आग्रह गरिएको छ। मरेका कुखुरालाई सुरक्षित तरिकाले व्यवस्थापन गर्नुपर्ने जनाइएको छ। विभागले कुखुरा तथा कुखुराजन्य उत्पादन ओसारपसार गर्दा अनिवार्य रूपमा भेटेरिनरी प्रमाणपत्र लिनुपर्ने बताउँदै, कुनै स्थानमा असामान्य रूपमा कुखुरा बिरामी पर्ने वा मर्ने अवस्था देखिएमा नजिकको पशु सेवा कार्यालयमा तुरुन्त जानकारी गराउन अनुरोध गरेको छ।