काठमाडौं — विपद्मा परेका परिवारलाई सहयोग गर्न अभिनेत्री प्रियंका कार्की राहत अभियानमा सक्रिय भएकी छन्। उनले आफ्नो ठाउँबाट सक्ने सहयोग गर्न सबैलाई आग्रह गर्दै सानोभन्दा सानो योगदानले पनि संकटमा परेका परिवारका लागि ठूलो अर्थ राख्ने बताएकी छन्। कार्कीले सामाजिक सञ्जालमार्फत अहिले सहयोग गर्ने समय भएको उल्लेख गर्दै आर्थिक सहयोगको मात्रा ठूलो वा सानोभन्दा पनि त्यसले पीडितको जीवनमा पार्ने प्रभाव महत्वपूर्ण हुने बताएकी हुन्।
‘आफ्नो ठाउँमा बसेर जे जति गर्न सकिन्छ, गर्ने समय अहिले नै हो—किनभने नेपाललाई हाम्रो खाँचो छ,’ उनले लेखेकी छन्, ‘चाहे त्यो १० रुपैयाँको सहयोग होस् वा लाखौँको, तपाईंको हरेक साथ, सहयोग र योगदानले कसै न कसैको जीवनमा राहत र अनुहारमा मुस्कान ल्याइरहेको छ।’ कार्कीका अनुसार उनी र उनको टोली आपत्–विपत्मा परेका परिवारसम्म राहत पुर्याउन दिनरात खटिरहेका छन्। राहत सामग्री संकलन, व्यवस्थापन तथा प्रभावित परिवारसम्म पुर्याउने काममा आफू पनि प्रत्यक्ष रूपमा सहभागी भइरहेको उनले बताएकी छन्।
उनले अभियानमा साथ दिने सबै सहयोगी मनहरूप्रति आभार व्यक्त गर्दै राहत कार्यलाई निरन्तरता दिन आग्रह गरेकी छन्। ‘हामी पनि दिनरात प्रयासरत छौँ, आपत्–विपत्मा परेका परिवारहरूसम्म आफ्नै हातले राहत पुर्याउन,’ उनले भनेकी छन्, ‘यस अभियानमा हातेमालो गर्नुहुने सम्पूर्ण सहयोगी मनहरूलाई हृदयदेखि नमन र धन्यवाद।’
सामाजिक कार्यमा समेत सक्रिय कार्की र अभिनेता आयुष्मान देशराज जोशीले आयंका फाउन्डेसन स्थापना गरेका हुन्। फाउन्डेसनले बालबालिका, स्वास्थ्य, सरसफाइ तथा सामाजिक सेवाका क्षेत्रमा काम गर्दै आएको छ। कार्कीको राहत अभियानसँग जोडिएको मानवीय पहलले पनि विपद्को समयमा कलाकार तथा सार्वजनिक व्यक्तित्वले निर्वाह गर्न सक्ने सामाजिक भूमिकालाई उजागर गरेको छ।
विपद्का बेला पीडित परिवारलाई खाद्यान्न, लत्ताकपडा, आश्रय र अन्य आधारभूत सामग्रीको आवश्यकता पर्छ। यस्तो अवस्थामा आफ्नो क्षमताअनुसार गरिएको सहयोगले उनीहरूलाई कठिन समय पार गर्न केही सहज बनाउने कार्कीको विश्वास छ। उनले सहयोगलाई रकमको हिसाबले मात्र नहेर्न पनि आग्रह गरेकी छन्। समय, श्रम, राहत सामग्री वा आर्थिक सहयोग जुनसुकै माध्यमबाट गरिएको योगदानले पीडित परिवारलाई आफू एक्लो नभएको अनुभूति गराउन सक्ने उनको भनाइ छ।
‘आउनुहोस्, यो प्रयास जारी राखौँ। हातमा हात मिलाऔँ, नेपाललाई फेरि एकपटक उठाऔँ,’ कार्कीले अपिल गरेकी छन्। विपद्ले घरबार र सम्पत्ति गुमाउन बाध्य बनाएका परिवारका लागि तत्काल राहतसँगै भावनात्मक साथको पनि उत्तिकै आवश्यकता हुन्छ। त्यसैले संकटको यो समयमा एकअर्काको दुःखमा साथ दिनु र सक्ने सहयोग गर्नु नै सबैभन्दा ठूलो मानवीय जिम्मेवारी बन्न पुगेको छ। कार्कीले गरेको अपिलको मूल सन्देश पनि यही हो—सहयोगको मूल्य रकममा होइन, त्यसले कसैको जीवनमा ल्याउने आशामा हुन्छ।
