काठमाडौँ — देशभर फैलिएको जेनजी आन्दोलनका क्रममा नेपाली सेनाले हालको विषम परिस्थितिलाई थप जटिल नबनाउन र संयमता अपनाउन जनसमुदायमा अपिल गरेको छ। सेनाले जारी गरेको विज्ञप्तिमा भनिएको छ कि नेपाल र नेपाली जनताको जिउधनको सुरक्षा यसको प्राथमिक जिम्मेवारी हो। साथै, देशका ऐतिहासिक, सांस्कृतिक, पुरातात्त्विक र राष्ट्रिय सम्पत्तिको संरक्षण गर्नु सबैको साझा दायित्व रहेको स्मरण गराइएको छ।

सोमबार र मंगलबार दिनभर प्रदर्शनका क्रममा २० भन्दा बढी प्रदर्शनकारीको मृत्यु भइसकेको छ। राजधानीसहित देशका विभिन्न स्थानमा राष्ट्रपति, प्रधानमन्त्री, मन्त्रीहरू लगायत उच्च पदस्थहरूको कार्यालयमा आगजनी र तोडफोडका कारण अधिकांश संरचना क्षतिग्रस्त भएका छन्। यसैबीच, प्रधानमन्त्री केपी शर्मा ओलीले राजीनामा दिइसकेका छन्। नेपाली सेनाले विज्ञप्तिमा सबै नागरिक, विशेषगरी युवा पुस्तालाई सामाजिक सद्भाव कायम राख्दै संयम अपनाउन हार्दिक अनुरोध गरेको छ। सेनाले यस अवसरमा जनतालाई सम्झाउँदै भनेको छ, “विद्यमान परिस्थितिलाई थप जटिल नबनाइ सुरक्षित, संयमित र राष्ट्रिय एकताको भावना कायम राख्नु सबैको जिम्मेवारी हो।”