नेपालका पूर्वप्रधानमन्त्री केपी शर्मा ओलीलाई प्रहरीले पक्राउ गरेको छ। प्रहरीका अनुसार उनलाई आज बिहान भक्तपुरको गुण्डुस्थित निजी निवासबाट नियन्त्रणमा लिएर काठमाडौं जिल्ला प्रहरी परिसर लगिएको हो।गत भदौ २३ गते भएको ‘जेनजी आन्दोलन’ का क्रममा १९ जनाको ज्यान गएको घटनाबारे अनुसन्धान गर्न प्रहरीले उनलाई नियन्त्रणमा लिएको जनाएको छ। उक्त घटनासँग सम्बन्धित अनुसन्धानका क्रममा तत्कालीन गृहमन्त्री रमेश लेखक लाई पनि आज बिहान भक्तपुरको कुटुन्जेस्थित निवासबाट प्रहरीले पक्राउ गरेको छ।
घटनाबारे सत्यतथ्य पत्ता लगाउन गठित जाँचबुझ आयोगले केही दिनअघि सार्वजनिक गरेको प्रतिवेदनमा घटनासम्बन्धी केही उच्च पदस्थ व्यक्तिहरूमाथि थप अनुसन्धान आवश्यक रहेको उल्लेख गरिएको थियो। सो प्रतिवेदनमा पूर्वप्रधानमन्त्री ओली, तत्कालीन गृहमन्त्री लेखक तथा पूर्वप्रहरी महानिरीक्षक चन्द्रकुवेर खापुङ लगायत व्यक्तिहरूको भूमिकाबारे अनुसन्धान गर्नुपर्ने सुझाव दिइएको बताइएको छ।
प्रहरी स्रोतका अनुसार उक्त घटनासम्बन्धी अनुसन्धान मुलुकी अपराध संहिता २०७४ को दफा १८२ अन्तर्गत ‘हेलचेक्र्याईं गरी ज्यान मार्ने’ कसुरसँग सम्बन्धित विषयमा केन्द्रित गरिएको छ। यस कानुनी व्यवस्थाअनुसार कसैको ज्यान हेलचेक्र्याईंका कारण गएको प्रमाणित भए अधिकतम तीन वर्षसम्म कैद र ३० हजार रुपैयाँसम्म जरिवाना हुन सक्ने प्रावधान रहेको छ।
पक्राउ गर्नुअघि पूर्वप्रधानमन्त्री ओलीले आफ्ना कानुन व्यवसायीहरूसँग परामर्श गरेका थिए। उनले आफूलाई पक्राउ गर्नु राजनीतिक प्रतिशोधको परिणाम भएको दाबी गर्दै कानुनी रूपमा प्रतिवाद गर्ने बताएका छन्। सो क्रममा उनले पूर्वमहान्यायाधिवक्ता रमेश बडाल तथा वरिष्ठ अधिवक्ता टिकाराम भट्टराई सँग छलफल गरेका थिए।
यसैबीच नवनियुक्त प्रधानमन्त्री बालेन शाहले पद तथा गोपनीयताको शपथ लिएलगत्तै बसेको मन्त्रिपरिषद् बैठकले उक्त जाँचबुझ आयोगले बुझाएको प्रतिवेदन कार्यान्वयन गर्ने निर्णय गरेको बताइएको छ। त्यसपछि गृहमन्त्रालयमार्फत घटनाबारे थप अनुसन्धान गर्न प्रहरीलाई निर्देशन दिइएको थियो।
महान्यायाधिवक्ताको कार्यालयसँग सम्बन्धित स्रोतका अनुसार घटनामा ज्यान गुमाएका तथा घाइते भएका व्यक्तिका परिवारबाट परेको उजुरीका आधारमा अनुसन्धान प्रक्रिया अघि बढाइएको हो।प्रहरीले उनीहरूलाई जरुरी पूर्जीका आधारमा पक्राउ गरेको जनाएको छ। कानुनी प्रावधानअनुसार पक्राउ परेका व्यक्तिलाई स्वास्थ्य परीक्षण गराइनेछ र २४ घण्टाभित्र सम्बन्धित अदालत अर्थात् काठमाडौं जिल्ला अदालतमा उपस्थित गराइनेछ।
नेपालको राजनीतिक इतिहासमा मुलुकको कार्यकारी नेतृत्व सम्हालिसकेका पूर्वप्रधानमन्त्रीलाई ज्यानसम्बन्धी फौजदारी अभियोगको अनुसन्धानका क्रममा पक्राउ गरिएको घटना अत्यन्त दुर्लभ मानिएको छ। यसअघि राजनीतिक आन्दोलन वा प्रदर्शनका क्रममा केही पूर्वप्रधानमन्त्रीहरू प्रहरी नियन्त्रणमा परे पनि ज्यानसम्बन्धी अभियोगमा अनुसन्धानका लागि पक्राउ गरिएको उदाहरण कम रहेको विश्लेषकहरूले बताएका छन्।
