धार्मिक तथा पर्यटकका लागि प्रसिद्ध मुक्तिनाथ मन्दिरको १०८ धारामा अब मर्यादा विपरीत पोशाक लगाएर नुहाउन रोक लगाइएको छ। यसअघि श्रद्धालु र पर्यटकहरूले छाता, प्लाष्टिक, रेनकोट ओढेर वा दुई कुण्डमा सुइमिङ ड्रेस लगाएर स्नान गर्ने गरेका थिए। वर्षेनी आठ लाखभन्दा बढी नेपाली, भारतीय र अन्य देशका नागरिक मुक्तिनाथ पुग्ने हुँदा, धार्मिक परम्परा र मर्यादा पालनामा ध्यान दिन आवश्यक देखिएको समितिले जनाएको छ।

मुक्तिनाथ विकास समितिका कोषाध्यक्ष तथा वारागुङ मुक्तिक्षेत्र–१ का वडाध्यक्ष प्रमेश गुरुङका अनुसार, भक्तजनलाई नियमका बारेमा पूर्व जानकारी दिइनेछ र स्वयंसेवकमार्फत निगरानी गरिनेछ। उनले भने, “मन्दिर क्षेत्रमा दर्शन तथा स्नान गर्ने भक्तजनलाई सहज हुने गरी पूर्वाधार विस्तार र अन्य सुविधा थपिएको छ। सबैले धार्मिक परम्परा पालना गर्नुपर्छ।” समितिले भक्तजन र पर्यटकलाई नियम पालनामा सहयोग गर्न आग्रह गरेको छ। यस कदमले धार्मिक स्थलको पवित्रता कायम राख्ने र पर्यटकहरूको अनुभवलाई सकारात्मक बनाउने अपेक्षा गरिएको छ।