काठमाडौं । सिन्धुलीको गोलन्जोर गाउँपालिका–६ स्थित छेत्पा नजिकैको भण्डास बिप्पर कटेरी भन्ने ठाउँबाट एकै परिवारका १६ जना बेपत्ता भएका छन्। स्थानीय उर्मिला हायुको परिवार बिहीबार साउन ९ गते घरमै सुँगुर काटेर खाएको जानकारी प्राप्त भएको छ। त्यसयता उनीहरू सम्पर्कविहीन छन्।जिल्ला प्रहरी कार्यालय सिन्धुलीका अनुसार उक्त परिवारको खोजी कार्य जारी छ। प्रहरीले रामेछापमा पनि खोजी सुरु गरेको छ, जहाँ हायु समुदायको बाक्लो बसोबास छ।

बेपत्ता परिवारको घर एकान्तमा रहेकाले घटना ढिलो थाहा भएको बताइएको छ। घर वरिपरि केही भाँडाकुँडा र लुगाफाटाहरू फेला परेका छन् भने नजिकैको छाप्रोमा आगो बालिएको जस्तो देखिएको छ। स्थानीय प्रशासन, प्रहरी र गाउँलेहरू मिलेर खोजी अभियान अघि बढाइरहेका छन्। प्रारम्भिक अनुमानअनुसार आर्थिक समस्या वा अन्य व्यक्तिगत कारणले परिवारले घर छाडेको हुन सक्ने बताइएको छ, तर यकिन कारण पत्ता लागेको छैन।सुरक्षा निकायहरूले नागरिकलाई कुनै जानकारी भए नजिकको प्रहरी कार्यालयमा जानकारी गराउन आग्रह गरेका छन्।