काठमाडौं । आजबाट देशभर नेपाली चलचित्र ‘बोक्सीको घर’ प्रदर्शन हुने भएको छ । बुधबार काठमाडौंमा एक कार्यक्रमबीच चलचित्रको प्रिमियर शो भएको हो । प्रिमियर शो कार्यक्रमपछि सिनेपत्रकारहरुसँग कुरा गर्दै कलाकारहरुले चलचित्रले सामाजिक कथावस्तु बोकेको बताए ।
चलचित्र विकास बोर्डका अध्यक्ष भुवन केसीले ‘माइण्ड ब्लोइङ’ रहेको प्रतिक्रिया दिए । उनले चलचित्र चुनौतिपूर्ण विषयमा बनेको बताए । उनले आजको दिनमा यस विषयमा चलचित्र निर्माण गर्नु नै चुनौतिको विषय भएको बताए । त्यस्तै अभिनेता शोभित बस्नेतले बोक्सीको घटना आफूले नदेखेको र विश्वास पनि नरहेको बताए । उनले महिलालाई बोक्सीको आरोपमा पीडित बनाएको कथावस्तुहरु फिल्ममा उतारिएको बताए ।
त्यस्तै अभिनेत्री दीपाश्री निरौलाले बोक्सीको घर चलचित्रको विषय चलचित्रकर्मीहरुले उठाउनुपर्ने विषय भएको बताइन । उनले विकृति, विसंगतिलाई चिर्नुपर्ने ऐनाको पर्यायको रुपमा बोक्सीको घर निर्माण भएको बताईन । त्यस्तै अभिनेत्री निशा अधिकारीले चलचित्र सबै किसिमबाट उत्कृष्ट रहेको बताईन । उनले चलचित्र बन्नु नै पर्ने रहेको बताईन । त्यस्तै अभिनेत्री बेनिसा हमालले चलचित्रले कुप्रथा र अन्धविश्वासलाई मान्न नहुने सन्देश दिएको बताइन । उनले अहिले पनि समाजमा धेरै महिलाहरु यस प्रकारको कुप्रथाबाट पीडित रहेको बताईन ।
अभिनेत्री स्वस्तिमा खड्काले चलचित्र उत्कृष्ट रहेको र समाजको कथा बोकेको बताईन । उनले महिलालाई बोक्सी भनिन्छ भनेर पुरुषलाई भन्नुपर्छ भन्नेतिर नभइ कसैलाई पनि यसबाट पीडित बनाउनेतिर लाग्नु नहुने बताईन । अभिनेत्री केकी अधिकारीले चलचित्रमा सामाजिक यथार्थवादी चित्रण गरिएको बताईन । उनले एउटा व्यक्तिको जीवन यात्राको कथा चलचित्रमा समेटिएको बताईन । समाजका कुऋतिका कारण उज्वल भविष्य बनाउनसक्ने व्यक्तिको जीवन सकिन्छ भन्नेकुरा चलचित्रमा देखाइएको बताईन । अभिनेता सलोन बस्नेतले सुनेका कुराहरु सिनेमामा देखाउन खोजेको कुराले मन छोएको र समुदायको घटनालाई आवाज उठाएकोमा खुशी लागेको बताए ।
चलचित्र बोक्सीको घर शुक्रवारबाट प्रदर्शनमा आउँदैछ । भर्खरै स्कुल पढ्दै गरेकी नाबालिकाको विवाह आफूभन्दा २४ वर्ष जेठो पुरुषसँग भएपछि उसले अन्धविश्वासका कारण समाजबाटै भोगेको हिंसाको कथा फिल्ममा देखाइएको छ । समाजमा बोक्सी भनेर लगाइने आरोप र त्यसकै आधारमा महिलामाथि हुने अन्यायलाई फिल्ममा मुख्य कथावस्तु बनाइएको छ । अन्धविश्वासका कारण समाज कतिसम्म क्रुर बन्नसक्छ भन्ने तथ्यलाई समेत कलात्मक ढंगले फिल्ममा देखाइएको छ ।
चलचित्रका लेखक एवं निर्देशक सुलक्षण भारती रहेका छन । सुलक्षण भारतीको लेखन तथा निर्देशनमा बनेको यो चलचित्रमा केकी अधिकारी, श्वेच्छा राउत, सुष्मा निरौला, सविन बाँस्तोला, सुपला सापकोटा लगायतका कलाकारको अभिनय रहेको छ ।
