राष्ट्रिय परीक्षा बोर्डले निरीक्षणको नाममा पटक–पटक धेरै संख्यामा मानिसहरू परीक्षा हलमा नजान निर्देशन दिएको छ । बिहीबारदेखि सुरु भएको परीक्षामा निरीक्षणको नाममा आधिकारिकभन्दा पनि अन्य व्यक्तिहरू पनि पटक–पटक धेरै संख्यामा परीक्षा केन्द्र र परीक्षा हलमा जानाले परीक्षार्थीको लेखन कार्य प्रभावित भएको भन्ने गुनासा आएको भन्दै यसो नगर्न आग्रह गरेको हो ।
हिजो भएको अंग्रेजी विषयको परीक्षामा यस्तै समस्या भएको भनी केही जिल्लाका केन्द्रहरूबाट गुनासो आएको भन्दै अब यसो नगरी परीक्षालाई व्यवस्थित, भयरहित र शान्तिपूर्ण वातावरणमा सञ्चालन गर्न तथा गर्ने व्यवस्था मिलाउन बोर्डले एक विज्ञप्ति जारी गर्दै सोहीमार्फत् सम्बन्धित सबैलाई आग्रह गरेको छ । बोर्डले निर्भय र उच्च मनोबलका साथ परीक्षा दिन परीक्षार्थीहरूलाई समेत आग्रह गरेको छ ।चैत २७ गते सम्पन्न हुने परीक्षामा पाँच लाख चार हजार चार सय १४ परीक्षार्थी सहभागी भएका छन ।
