काठमाडौं, फागुन १२ – देशभर मौसममा उतारचढाव जारी रहेको छ। पश्चिमी वायु तथा स्थानीय वायुको प्रभावका कारण आज पनि कोशी प्रदेशसहित पहाडी भूभागमा आंशिकदेखि साधारण बदली भएको मौसम पूर्वानुमान महाशाखाले जनाएको छ। महाशाखाका अनुसार तराई र उपत्यकाका केही जिल्लामा बाक्लो हुस्सु लागेको छ, जसले जनजीवन तथा यातायातमा असर पुर्याउने देखिएको छ।यसैगरी, कोशी, बागमती र गण्डकी प्रदेशका पहाडी भूभागका केही स्थानमा तथा अन्य प्रदेशका पहाडी भागका एक-दुई स्थानमा मेघगर्जन र चट्याङसहित हल्का वर्षा हुने सम्भावना रहेको छ।

त्यसैगरी, कोशी, बागमती र गण्डकी प्रदेशका उच्च पहाडी तथा हिमाली भूभागका केही स्थानहरूमा तथा अन्य प्रदेशका हिमाली भागमा हल्का हिमपातको सम्भावना रहेको छ। महाशाखाले चट्याङ, वर्षा र हिमपातका कारण दैनिक जनजीवन, स्वास्थ्य, सडक तथा हवाई यातायातमा असर पर्न सक्ने भएकाले सतर्क रहन अपिल गरेको छ। विशेषगरी उच्च पहाडी तथा हिमाली क्षेत्रमा बसोबास गर्ने तथा यात्रा गर्नेहरूले आवश्यक सतर्कता अपनाउनुपर्ने सुझाव दिइएको छ।