नेपालले एसिसी पुरुष यु–१६ इस्ट जोन कप क्रिकेट प्रतियोगिता २०२५ को उपाधि सफलतापूर्वक रक्षा गरेको छ। शनिबार सम्पन्न फाइनल खेलमा नेपालले सिंगापुरलाई २ विकेटले पराजित गर्दै लगातार दोस्रो पटक उपाधि उचालेको हो। नेपालले यसअघि सन् २०२३ मा पनि यो प्रतियोगिता जितेको थियो।

सिंगापुरले दिएको ११४ रनको लक्ष्य पछ्याउने क्रममा नेपालले २९ ओभरमा ८ विकेट गुमाउँदै ११७ रन बनायो। नेपालले सुरुवाती चरणमै ५८ रनमै ५ विकेट गुमाएको थियो। तर, जोय थापा र अन्य मध्यक्रमका ब्याट्सम्यानहरूले इनिङ सम्हाले। नेपालको जितमा जोय थापा नायक बने। उनले ५३ बलमा ३ चौका सहित अविजित २४ रन बनाए। उनले शुभम खनालसँग ३३ र अभय यादवसँग अविजित २५ रनको साझेदारी गर्दै टिमलाई कठिन अवस्थाबाट जितसम्म पुर्‍याए। अभय यादवले अविजित १० रन बनाए।

नेपालका शिवान्स बजगाईंले २०, शुभम खनालले १८, प्रशिद्ध जैशीले १७ र परिमार्जन यादवले १३ रनको योगदान गरे। यद्यपि, सिंगापुरका बलरहरूले सुरुवातमै दबाब बनाए। सिंगापुरका कपिस वैंकटरमनले उत्कृष्ट बलिङ गर्दै ६ ओभरमा १८ रन दिँदै सर्वाधिक ४ विकेट लिए। युवान पाण्डेले २, वेदांश गुप्ता र आकाश तेजाले १–१ विकेट लिए। यसअघि समूह चरणमा नेपालले सिंगापुरलाई ६ विकेटले हराउँदै समूह विजेता बनेको थियो। फाइनलमा पुनः भेट हुँदा सिंगापुर हारको बदला लिन असफल रह्यो।

नेपालले यस प्रतियोगितामा सन् २०२३ को विजयी पदको रक्षा गरेको हो। नेपाल क्रिकेट संघ (CAN) र नेपाली क्रिकेट समर्थकहरूले यस जितलाई युवा स्तरको क्रिकेटमा ठूलो उपलब्धिका रूपमा लिएका छन्। युवा खेलाडीहरूको संयम, सामूहिक प्रयास र रणनीतिक बलिङले उपाधि सुनिश्चित गरेको प्रेक्षकहरूले प्रतिक्रिया दिएका छन्।