प्रधानमन्त्री केपी शर्मा ओली शाङ्घाई सहयोग संगठन (SCO) को शिखर सम्मेलनमा सहभागी हुन आज जनवादी गणतन्त्र चीनको थियानजिन सहर पुगेका छन्। चीनका राष्ट्रपति सी चिनफिङको मैत्रीपूर्ण निमन्त्रणामा ओली नेपाली प्रतिनिधिमण्डलको नेतृत्व गर्दै हिमालय एयरलाइन्सको विशेष विमानमार्फत थियानजिन विनहाइ अन्तर्राष्ट्रिय विमानस्थलमा पुगे।
त्यहाँ उनलाई चीन सरकारका उच्च अधिकारीहरू र नेपालका लागि चीनका राजदूत डा. कृष्णप्रसाद ओली र चेन सोङले स्वागत गरेका थिए। प्रधानमन्त्री ओली र राष्ट्रपति सी चिनफिङबीच आजै भेटवार्ता हुने तयारी छ, जसमा दुवै पक्षका आपसी चासोका विषयमा छलफल हुने अपेक्षा गरिएको छ।
प्रधानमन्त्री ओलीको भ्रमणको कार्यतालिकामा सेप्टेम्बर ३ मा बेइजिङमा आयोजित ८०औं वार्षिकोत्सवका स्मृति कार्यक्रममा पनि सहभागी हुने उल्लेख छ। यससँगै, प्रधानमन्त्री ओलीले सेप्टेम्बर १ मा तियानजिनमा आयोजना हुने SCO शिखर सम्मेलनलाई सम्बोधन गर्नेछन्। सम्मेलनमा सहभागी हुने केही प्रमुख विश्व नेताहरूसँग भेटघाटको पनि कार्यक्रम रहेको छ।
प्रधानमन्त्रीको यस भ्रमणले नेपाल र चीनको सम्बन्धलाई थप प्रगाढ बनाउन र द्विपक्षीय सहयोगका विविध क्षेत्रहरूमा प्रगति ल्याउन महत्वपूर्ण भूमिका खेल्ने अपेक्षा गरिएको छ।
