नेपाली कांग्रेसका महामन्त्री विश्वप्रकाश शर्माले आगामी प्रतिनिधिसभा निर्वाचन नलड्ने घोषणा गरेका छन्। बिहीबार बसेको पार्टीको केन्द्रीय कार्यसम्पादन समिति बैठकमा शर्माले आफू उम्मेदवार नहुने स्पष्ट पारेका हुन्।पार्टीले शर्मालाई झापा–१ बाट सर्वसम्मत रूपमा उम्मेदवारका लागि सिफारिस गरेको थियो। तर, उनले सिफारिसप्रति धन्यवाद दिँदै व्यक्तिगत तथा संगठनात्मक कारण देखाउँदै निर्वाचनमा नउत्रिने निर्णय सुनाएका हुन्। बैठकमा शर्माले पार्टी संगठन मजबुत बनाउने, नीति तथा विचार निर्माणमा केन्द्रित रहने र नयाँ नेतृत्वलाई अवसर दिने उद्देश्यले यस्तो निर्णय लिएको बताएका छन्।

उनको घोषणापछि झापा–१ मा कांग्रेसको उम्मेदवार चयन प्रक्रिया पुनः सुरु हुने भएको छ। साथै, शर्माको निर्णयलाई पार्टीभित्र जिम्मेवारी र भूमिकाको पुनःपरिभाषाका रूपमा हेरिएको छ। राजनीतिक विश्लेषकहरूले यस कदमले कांग्रेसभित्र नेतृत्व विकास र आन्तरिक लोकतन्त्रलाई सन्देश दिने बताएका छन्।