भारत र चीनले दुई देशबीचको सीमावर्ती व्यापार पुनः सुरु गर्ने सहमति गरेका छन्। हालै भारत भ्रमणमा रहेका चिनियाँ विदेश मन्त्री वाङ यी र भारतीय विदेश मन्त्री एस। जयशंकरबीच सम्पन्न बैठकपछि यो सहमति भएको हो। दुई दिन लामो भ्रमणपछि जारी संयुक्त विज्ञप्तिमा उल्लेख भएअनुसार, दुबै पक्षले लिपुलेक पास, शिप्कीला पास र नाथुला पासमार्फत सीमा व्यापार पुनः सञ्चालन गर्ने निर्णय गरेका छन्। विज्ञप्तिको नवौं बुँदामा यस विषयलाई स्पष्ट गरिएको छ।
सन् २०२० मा गलवान उपत्यकामा भएको झडपपछि भारत–चीन सम्बन्धमा देखिएको चिसोपनलाई कम गर्दै पुनः संवादको वातावरण बनाउने प्रयासस्वरूप यो सहमति भएको बताइएको छ। त्यसपछिका केही वर्षमा सीमावर्ती व्यापार पूर्ण रूपमा स्थगित गरिएको थियो। हालको सहमति क्षेत्रीय स्थायित्व, आर्थिक सहकार्य र पारवर्ती जनजीवनमा सकारात्मक प्रभाव पार्ने उद्देश्यले गरिएको मानिएको छ। विशेष गरी हिमाली क्षेत्रका साना व्यापारी र स्थानीय समुदायले यसबाट राहत पाउने अपेक्षा गरिएको छ।
साथै, चीनमाथि अमेरिकी ट्यारिफको दबाब र दक्षिण एशियामा चीनको रणनीतिक चासोले पनि भारतसँगको व्यापारिक सम्बन्ध सुधार्न प्रेरित गरेको विश्लेषण गरिएको छ। यो सहमति पछिल्लो समय भएको दोस्रो उच्चस्तरीय संवाद हो, जसले दुई देशबीचको विश्वास पुनः निर्माणतर्फको संकेत दिन्छ।
