काठमाडौंको दरबारमार्गस्थित उडल्यान्ड होटल रहेको भवनमा आज बिहान लागेको आगलागी पूर्ण रूपमा नियन्त्रणमा आएको छ। प्रहरीका अनुसार बिहान करिब १०:१५ बजे भवनबाट धुवाँ र आगो देखिएपछि दमकल, नेपाल प्रहरी र स्थानीयको सहयोगमा आगो निभाउने काम सुरु गरिएको थियो। केही समयको प्रयासपछि आगलागी नियन्त्रणमा ल्याइएको हो।

आगलागीका कारण होटल र भवनका केही भागमा क्षति पुगेको भए पनि कुनै मानवीय क्षति नभएको प्रहरीले जनाएको छ। घटनाका बेला होटलमा रहेका कर्मचारी तथा पाहुनालाई सुरक्षित रूपमा बाहिर निकालिएको थियो।

आगो लाग्नुको कारण हालसम्म खुल्न सकेको छैन। प्रारम्भिक रूपमा विद्युत् सर्ट सर्किट वा अन्य प्राविधिक कारण हुन सक्ने आशंका गरिएको छ। आगलागीबाट भएको क्षतिको विवरण संकलन तथा घटनाको कारण पत्ता लगाउन थप अनुसन्धान भइरहेको प्रहरीले जानकारी दिएको छ। घटनापछि केही समय दरबारमार्ग क्षेत्रमा सवारी आवागमन प्रभावित भएको थियो। अहिले अवस्था सामान्य बन्दै गएको प्रहरीको भनाइ छ।