काठमाडौं – चन्द्रागिरि नगरपालिका–१० मा अवस्थित ऐतिहासिक तथा धार्मिक महत्व बोकेको विन्ध्यवासिनी मन्दिरको पुनःनिर्माण कार्य सुरु भएको छ। लामो समयदेखि धार्मिक आस्थाको केन्द्रका रूपमा रहेको मन्दिरको संरचना व्यवस्थित र थप सुदृढ बनाउने उद्देश्यले पुनःनिर्माण अघि बढाइएको हो। चन्द्रागिरि नगरपालिका–१० को विन्ध्यवासिनी मन्दिर स्थानीय धार्मिक तथा सांस्कृतिक सम्पदाका रूपमा परिचित छ। नगरपालिकाका विभिन्न योजनासम्बन्धी अभिलेखमा समेत मन्दिरको संरचनात्मक कामका लागि बजेट विनियोजन भएको थियाे। आर्थिक वर्ष २०८०/ ८१ को नगरपालिकाको बजेट तथा कार्यक्रमसम्बन्धी राजपत्रमा ‘विन्ध्यवासिनी मन्दिर दोस्रो तला ढलान’ शीर्षकमा वडा नं. १० का लागि ४ लाख रुपैयाँ विनियोजन गरिएको उल्लेख गरिएकाे थियाे।

यसअघि पनि मन्दिर तथा आसपासको धार्मिक क्षेत्रको पूर्वाधार विकासका लागि विभिन्न तहबाट काम हुँदै आएको थियाे। सार्वजनिक अभिलेखमा चन्द्रागिरि–१० स्थित विन्ध्यवासिनी मन्दिर पूर्व–विन्ध्याश्रम सडक निर्माण तथा सुधारका लागि समेत बजेट विनियोजन गरिएको थियाे। यसले मन्दिरलाई धार्मिक गन्तव्यका रूपमा विकास गर्ने प्रयास पछिल्ला वर्षहरूमा निरन्तर हुँदै आएको देखाउँछ। विन्ध्यवासिनी मन्दिर चन्द्रागिरिको धार्मिक तथा पर्यटकीय क्षेत्रसँग जोडिएको महत्वपूर्ण स्थल हो। चन्द्रागिरि क्षेत्रमा रहेका ऐतिहासिक, धार्मिक तथा पर्यटकीय स्थलहरूको सूचीमा वडा नं. १० को विन्ध्यवासिनी मन्दिरलाई समेत प्रमुख गन्तव्यका रूपमा राखिएकाे छ।

मन्दिर परिसरको भौतिक संरचना विकाससँगै यस क्षेत्रको धार्मिक पर्यटन प्रवर्द्धनको सम्भावना पनि जोडिएको छ। चन्द्रागिरि क्षेत्रमा विन्ध्यवासिनी मन्दिरसँगै दहचोक, काजी कालु पाँडेको समाधिस्थल, चन्द्रागिरि डाँडा लगायतका ऐतिहासिक तथा पर्यटकीय स्थल रहेका कारण धार्मिक तथा ऐतिहासिक गन्तव्यलाई एकीकृत रूपमा विकास गर्न सकिने सम्भावना रहेकाे छ। विन्ध्यवासिनी मन्दिर नजिकै रहेको काजी कालु पाँडेको समाधिस्थलको समेत पर्यटकीय महत्व रहेको छ।

मन्दिर पुनःनिर्माणको कामले पुरानो धार्मिक महत्व कायम राख्दै भौतिक संरचनालाई थप व्यवस्थित बनाउने अपेक्षा गरिएको छ। विशेषगरी मन्दिरको संरचना, पूजा–आराधना गर्ने स्थान, भक्तजनको आवागमन तथा परिसर व्यवस्थापनलाई ध्यान दिएर काम अघि बढाउन सके स्थानीय बासिन्दासँगै बाहिरी क्षेत्रबाट आउने श्रद्धालुलाई पनि सहज हुने देखिन्छ।