चितवन — भरतपुर महानगरपालिका–२ आँपटारीस्थित विद्युत् सबस्टेसन नजिक रुख ढलेपछि केही समय सडक अवरुद्ध भएको छ। आइतबार बिहान रुख ढलेर सडकमा पुगेपछि उक्त सडकखण्डमा सवारी आवागमन प्रभावित भएको थियो।

सडक अवरुद्ध भएको जानकारी पाएपछि सशस्त्र प्रहरी बल, नेपाल नं. १७ गण चितवनबाट प्रहरी टोली घटनास्थलमा पुगेको थियो। टोलीले सडकमा ढलेको रुख काटेर तथा पन्छाएर अवरोध हटाएको सशस्त्र प्रहरीले जनाएको छ।

रुख हटाएपछि सडक पुनः सञ्चालनमा आएको छ। अवरोध हटाइएपछि उक्त सडकखण्डमा सवारी आवागमनसमेत सहज भएको छ। वर्षा तथा हावाहुरीका कारण सडक आसपासका रुख तथा हाँगा ढल्दा यातायातमा अवरोध हुने सम्भावना रहने भएकाले सम्बन्धित निकायले जोखिमयुक्त स्थानमा आवश्यक निगरानी बढाउनुपर्ने देखिएको छ।