हालैको बाढीले विशेषगरि आपूर्ति प्रणाली प्रभावित हुँदा काठमाडौं उपत्यकामा खाना पकाउने एलपी ग्यासको चरम अभाव देखिएको छ । तर सरकारले सहज आपूर्तिको वैकल्पिक व्यवस्था गरेको दाबी गरिरहेको छ । उद्योग, वाणिज्य तथा आपूर्तिमन्त्री गौरीकुमारी यादवले उपभोक्तालाई तत्काल ग्यास उपलब्ध गराउन सम्बन्धित निकायलाई निर्देशन दिनुभएको छ ।

काठमाडौं उपत्यकामा उपभोक्ताले आफूले प्रयोग गर्दै आएको कम्पनीको ग्यास नपाएको अवस्थामा त्यही मूल्यमा अर्को कम्पनीको सिलिन्डर साटेर ग्यास उपलब्ध गराउन उहाको निर्देशन छ । बाढीका कारण सिर्जना भएको आपूर्ति असहजतालाई तत्काल सम्बोधन गर्दै उपभोक्तालाई राहत दिन यो नियम ल्याइएको मन्त्रालयको भनाइ छ ।तर यो व्यवस्था हाललाई काठमाडौं उपत्यकाभित्र मात्र लागु हुनेछ । यो व्यवस्था तत्काल र प्रभावकारी रूपमा कार्यान्वयन गर्न मन्त्री यादवले नेपाल आयल निगम र सम्बन्धित ग्यास उद्योगहरूलाई निर्देशन दिनुभएको हो । साथै, यो विषम परिस्थितिमा उपभोक्तालाई अनावश्यक दुःख दिने, कृत्रिम अभाव सिर्जना गर्ने वा सरकारको निर्देशनविपरीत काम गरेको पाइएमा कानुनबमोजिम कडा कारबाही गरिने उहाको चेतावनी छ ।